قصيدة " ديمولوخية " للشاعرة ايمان بكرى - فيديو + كلمات

فيديو القصيده

كلمات القصيده

قصيدة " ديمولوخية " للشاعرة ايمان بكرى

سألت جارتنا أم بهيه
جوزها العامل فى البلديه
ما تقوللي يا لفندي يا جوزى
معنى الكلام الأراجوزي
اللى قالوه فى التلا فز يون
ديمراقراطيه .. ديرنقاطيه

كلمه ما تيجي ف يوم على بال
وأحلف دي شتمه يا عبد العال
قام قالها السيد جوزها
وهى بتمط فى بوزها
ما تبطلوا جهل يا جدعان
ديموقراطيه يا بهيّه
ما تفهمي بقى يا وليّه

ديمقراطيه .. ديمقراطي
خاصمي الكباب عند الحاتي
واتعشي على كيلو حراتي
وأنا أبوس فى قرطاس طعميّه

ديمقراطيه ومقريه
فى صحف جرايد مطويه
بتقول نعم بكرة وبعده
ولحد ألفين سنه جايّه

ديمقراطيه دي لعبتنا
عملوها جدعان حتتنا
عشان ما تحلو صورتنا
ويصدقوا إن عيشتنا
عايمة ف بحور العسليّه

ديموقراطيه ندلعها
وساعات كتير نلوي دراعها

وأنا مستعد أرجعها

بس أشتري يوم عتقيّه

ديموقراطية .. ديموقراطرط
وكلام كتير وبقى مرطرط
والكل مبسوط ومزقطط
ببرباطوزه اللي منقّط
من كدبه بقى ماشي يسقّط
على باب حارتنا المنسيّه

ديموقراطيه اتكلّم قول
تحيا البقول ويعيش الفول
رزق المدهول ع المسطول
والعيشه حلوه مسليّه

ديموقراطيه و مش هيّه
بس الشبه عشره الميّه
تسعه عشان العالميّه
وواحد لمون بالملوخيّه
ما تسكتي بقى يا وليّه
ف داهيه روحي انتي وهيّه

دي عشان تفوت الورديّه
يموت غفير..عشرين..ميّه
وأعيش خروف من غير ليّه
وأموت قتيل وما ليش ديّه

وتعيش جناب الديـ..مو.. لوخيه

.................................................................

 نبذه صغيره عن الشاعره
................................................................

الشاعرة "إيمان بكري" شاعرة رائعة تكتب شعر العامية
و أيضًا الفصحي،
ولكن هي مشهورة أكثر بالشعر العامّي
إيمان محمد بكري محمود

أو : إيمان بكري
شاعرة مصرية, ولدت في القاهرة
3/1/1955م
وفيها تلقت علومها الابتدائية والإعدادية والثانوية, والجامعية..
إلى أن نالت شهادة الليسانس في اللغة العربية, والدراسات الإسلامية من جامعة القاهرة, كلية الآداب.(دار علوم 1978)
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
صفحاتنا على الفيس بوك

شويه حب شويه تفاؤل

 حكي ツ ليل ونهار ツ خيال ツ إنجي مطاوع