وتوته توته نحكي حكاية سنين ملتوته

وتوته توته نحكي حكاية سنين ملتوته 

= = = = = =

ونبدأ من الاول مع أول ثورة في العصر الحالي لشعب مصر لكنها كانت ثورة مزاج ثورة عسكر وجيش مش شعب تعبه الجراح.

ثورة ضباط أحرار بقيادة محمد نجيب شوية ضباط واختاروه قائد استغلال للمكانة واللقب الكبير اهو يتحمل المسئولية لو الثورة فشلت وعاش الملك مات الملك نجيب كش ملك في يدوب سنه.

جمال عبد الناصر كان غاوي خطب الجنود راحوا اليمن وتقتلوا وقال في خطب وعندك 67 ومن تاني نام يا شعب آسفة لمعجبيه بس أنا مقتنعة انه كلامنجي بنى السد غطى على كل سيء بسد للان عايشين عليه ، كان من الإخوان لكنه سبهم عشان يعيش ويا شعبه كانت أخرته سم بفنجان قهوة كما تقول الإشاعات ويبقى في النهائة قائد رفع هامة شعبة عاليا أمام أي حاقد.

أنور السادات موال تاني وتالت وحكاية لا ليها بداية ولا نهاية أتسجن ومع هذا في عصره سجن وعذب أي صحفي أو صاحب قلم أو حتى سياسي معارض لكنه أخد القرار الصميم ورجع سينا بحرب عبقرية الذكاء ، خرج من معتقلاته الإخوان يضرب بيهم أي معارض شيوعي أو أيا كان وأتقتل على أيد صحاب زمان وسط عرض لولادة وفرحته بذكرى يوم عظيم وفي الاول والأخر مجتمعين على انه القائد الماهر الفذ صاحب نصر اكتوبر والعبور المجيد.

ونهاية ثورة الكبار ضد الملك كانت على أيد محمد مبارك ويا عيني حكم فترة باحترام ورجع طابا بمحادثات سلام لكنه طمع حتى مساعديه ، ما هو إذا كان رب البيت بالدف ضاربا فشيمة أهل البيت إيه غير الغناء والظلم ، وبقى الفُجر في كل مجال ونهايته كانت بثورة من شعب أتخنق.

قامت ثورة نزل الإخوان يوم 28 بعد ما كانت طول 3 أيام من يوم 25 يناير ثورة شعب عايش في الميادين بقت ثورة عنف في كل البلد ضرب تكسير والسجون أتفتحت والخبر الأكيد كان تنحى مبارك يوم 11/2/2011م.

ونبدأ اللعب من جديد مسك العسكر قلب الدنيا عذب وسجن وحاول يحكم وقالوا البلد فيها خونه كتير لكنه معرفش يحكمها ، أتقلب الشعب عليه ولان مينفعش يفضل ماهو معدش مصدر ثقة غير الجيش ومستحيل يضيعوا الأمان والثقة منه هو كمان ، قالوا يلا يا شعب روح انتخب.

ووصل الإخوان وقالوا انتخابات وفوزنا رغم أنهم من قبلنا عارفين ان الانتخابات كانت ليهم لعبه اتلعبت صح واستغلوا الشعب وانتخبهم وسط شكوك في فوز شفيق وتهديدات بالعنف لو الإشاعة صحيح وخدوا كرسي السلطان السلطة الكبيرة والمقام الرفيع.

محاولة سيطرة وتعويض سنين قهر وعذاب وحرمان عقد نفسية من قهر السجون لسنين طويلة ومع ذلك أتعودوا فيها على العيشة تحت الأرض وفي الضلمة عادي ، قالوا هنعمل كتير عشان الشعب الطيب وفي الأخر كان الريس بفرض حسن النية أضعف من كل اللي حط نفسه فيه ، استضعفوه جماعته قبل الفلول وقبل المستغلين وقبل كل من له مصلحة ووقع ، وقع عشان ضعفه قبل أي حاجة تانية ونسيب الاتهامات الحالية نعتبرها كأنها مش موجودة ونقول عليه راجل اتلعب بيه مهما ننكر يفضل رئيس ضعيف فشل يحمي نفسه قبل بلدة ووصلنا للي إحنا فيه.

الشعب أتخنق بسرعة خلال سنه ثار عليه زي ما قال لهم مرة ، قالك لاء مش لاعب فيها يا أخفيها دمي أنا وجماعتي يغطي البلد ومش هسيب الحكم ، طلعوا شيوخ قالوا لاء مش ثورة دي انقلاب كفرة علمانيين ضد الإسلام والدين ، يا عم أنت اهدي اتقي الله عايزين نعيش بكرامة مش اكتر لا فيها كفر ولا شغل المتنطعين.

ودلوقتي البلد أتنين لاء لاء تلاته ، تلت مع العسكر والشرطة رغم إننا عارفين كويس أوي الشرطة وعميلها ، وتلت مع المعزول يا حبيبنا يا ريس ومنهم بيقولوا مش إخوان إحنا بنحمي شرعية صندوق دنست لما عزلوا الريس (ليه هو مش إحنا اخترناه وهو قال ثوروا عليا ليه ما مخترش حقن الدم وراح ؟؟) ، والتلت التالت لا هنا ولا هنا فريق اللا فريق عارف مين هما الإخوان وعارف مين هما الشرطة وعارف أنهم مجرد لعبة مصالح وسياسة يدفع تمنها الشعب.

يا جماعة اللي عايز يحارب يروح يرجع لنا أم الرشراش (تل أبيب) لأنها في الأصل مصرية أو يحارب في فلسطين الحرب ليها مكانها ومكانها أكيد مش مصر.

يا شعب طيب وكل اللي بتتمناه حياة بسيطة كريمة سايب الكل يلعب بيك ولا أنت فاهم ومسيرك تنفض الكل وتقف صخر والكل ترميه في بحر غويط.

إنجي مطاوع